రెండో విడత గ్రీన్ ఛాలెంజ్‌కు ఎంపీ సంతోష్ శ్రీకారం

247
green challenge

తెలంగాణకు హరితహారంలో భాగంగా టీఆర్ఎస్ రాజ్యసభ సభ్యులు శ్రీకారం చుట్టిన గ్రీన్ ఛాలెంజ్‌కు విశేష స్పందన వచ్చిన సంగతి తెలిసిందే. ఏడాదిలో ఇప్పటివరకు రెండు కోట్ల మొక్కలు నాటారు. ఒకరు మొక్కనాటి మరో ముగ్గురు మొక్కలు నాటి,సంరక్షించేలా ఈ కార్యక్రమాన్ని ప్రారంభించారు.

ప్రారంభం సమయంలో తాను స్వయంగా మొక్క నాటి, ఉప రాష్ట్రపతి వెంకయ్య నాయుడు,గవర్నర్ నరసింహన్, నటుడు నాగార్జునను నామినేట్ చేశారు. వారందరూ కూడా మొక్కలు నాటి మరో ముగ్గురికి నామినేట్ చేయగా ఈ కార్యక్రమం విజయవంతంగా కొనసాగింది.

ప్రముఖులతో పాటు సామాన్యులు కూడా ఈ బృహత్ కార్యక్రమంలో భాగస్వామ్యులయ్యారు. గ్రీన్ ఛాలెంజ్‌ లక్ష్యం ఒక కోటికి చేరినప్పుడు మొక్కను టీఆర్ఎస్ వర్కింగ్ ప్రెసిడెంట్ కేటీఆర్ నాటారు. ప్రస్తుతం ఈ లక్ష్యం నేటికి రెండు కోట్లకు చేరటంతో మరో సారి ఎంపీ సంతోష్ మొక్క నాటారు. తాజాగా రెండో విడత గ్రీన్‌ ఛాలెంజ్‌కు శ్రీకారం చుట్టనున్నారు ఎంపీ సంతోష్.